БИШКЕК, 3-май. — Sputnik. Баткенде кыз бир кучак Айгүл гүлүн тамыры менен жулуп алган окуянын жоо-жайын милиция иликтеп жатканын Sputnik Кыргызстан агенттигинин кабарчысына Баткен ОИИБинин маалымат кызматынан билдиришти.
Социалдык тармактарда тамыры менен жулунган бир кучак Айгүл гүлүн кармап турган кыздын сүрөтү катуу талкууга алынды. Ал кыз өз сүрөтүнүн алдына "Какраз сезон аз калды", — деп жазып койгон. Мындан тышкары, ал сүрөткө жазылган комментарийлерге бул үчүн айып төлөп каларын дагы жакшы билерин айткан.
Бул сурөттөр интернет колдонуучулардын арасында нааразычылыктарды жаратты.
Облус милициясынын маалымат кызматынан иштин чоо-жайы иликтенип жатканын айтышты.
Ошондой эле өкмөттүн Баткен облусундагы ыйгарым укуктуу өкүлү Абиш Халмурзаев дагы кол алдындагыларга бул ишти көзөмөлгө алууну тапшыргандыгын билдирди.
Айгүл гүлү — өтө сейрек өсүмдүк катары Кыргызстандын Кызыл китебине киргизилген. Ал Кыргызстанда жана Түркстан кырка тоолорунда гана өскөндүктөн, Баткен облусунун жүзү болуп эсептелип, жылына бир жолу апрель айында гүлдөйт.
