БИШКЕК, 10-апр. — Sputnik. Бишкек шаардык мэриясынын алдына Чүй — Манас проспектисиндеги өтмөктө соода кылгандар митингге чыгышты. Бул тууралуу жеринен кабарчы билдирди.
Маалыматка ылайык, ага 20дай соодагер чогулуп, өтмөктөрдө апрель айынын ортосунда баштала турган оңдоо иштеринин башталышына каршы болушууда.
Нааразы болгондордун бири Гүлсайра Дүйшөнованын айтымында, соодагерлердин көбү насыя алып иштеп келүүдө.
"Шаардык бийлик бизди ойлобой эле алган насыяларыбыз менен көчөгө таштап салууда. Себеби алар бюджеттик акча менен өтмөктөрдү оңдуп, соода орундарын 20га чейин кыскартат экен. Андан кийин ал орундарды аукционго коюп сатат деп айтып жатышат, биз буга каршыбыз. Мэр шаардын сулуулугун ойлош керекпи же элдин жашоо-шартыны тынчсызданышы керекпи? Биз менен эч ким кеңешкен да жок ", — деди Дүйшөнова.
Мэрия жер өтмөктөрдү оңдоо иши 15-апрелде башталып, ага 36,5 миллион сом бөлүнгөнүн, ремонт иштеринен кийин буга чейин соода кылгандар ишин уланта берерин кабарлап келген.
