БИШКЕК, 24-мар. — Sputnik. Кыргыз-казак чек арасындагы "Кең-Булуң " өткөрүү пункту 27-марттан тарта жабылат. Бул тууралуу Мамлекеттик чек ара кызматы кабарлады.
Билдирүүгө ылайык, реконструкциялоо иштеринен улам адамдарга, жүк ташуучу жана жеңил унааларга "Кең-Булуңдан" өтүүгө тыюу салынат.
"Курулуш иштери азырынча качан бүтөрү белгисиз. Мындан улам жарандар кыргыз-казак чек арасына жакын "Ак жол", "Ак тилек", " Чалдыбар" жана "Токмок" өткөрүү пункттары аркылуу өтүп турса болот", — деп жазылат маалыматта.
Өткөрүү жайларындагы курулуш иштери 2016-жылдын октябрь айында өкмөт башчынын тапшырмасы менен башталган. Кыргызстан ЕАЭБге киргендигине байланыштуу кыргыз-казак чек арасында жайгашкан "Ак тилек" жана " Чалдыбар" өткөрүү пункттарын да реконструкциялоо пландалып жатат.
