Апрель-май айларында Кыргызстанга алып келине турган памирлик боордошторубуз Нарын облусунун беш районуна жайгаштырылат. Ал эми анын алдында эки айлык адаптация мөөнөтү болот. Бул туурасында Sputnik Кыргызстан агенттигине өкмөттүн Нарын облусу боюнча өкүлү Аманбай Кайыпов айтып берди.
"Алардын климаттык шарты биздин Нарынга ылайыктуу экен. Беш район (Ак-Талаа, Ат-Башы, Нарын, Кочкор, Жумгал — ред.) экиден үй-бүлө алат да, акимдер, айыл өкмөттөр жергиликтүү эл менен сүйлөшүп, кайсы айылга жайгаштырууну өздөрү ылайыкташтырат", — деди Кайыпов.
Мамлекеттик миграция кызматы буга чейин Улуу жана Кичи Памирде жашаган, тагыраагы Афганистандын Бадахшан аймагындагы жети жаштан 30 жашка чейинки 30 адамды Кыргызстанга алып келүү аракеттери жүрүп жаткандыгын кабарлаган эле.
