БИШКЕК, 18-фев. — Sputnik. Президент Алмазбек Атамбаев Азимжан Аскаровдун иши анын дагы башын оорутканын Европага болгон сапарынын алкагында Euronews телеканалына берген маегинде билдирди.
Өлкө башчы Аскаровдун ишин Брюссель менен Нью-Йоркто отуруп алып сындаган туура эмес экенин өз сөзүндө белгилеп өттү.
"Чынымды айтайын ушунча жылдан бери Аскаровдун иши менин дагы башымды оорутуп бүттү. Мен 15 жылдан ашык убакыт бою оппозицияда жүрдүм бирок журналист, укук коргоочу Аскаров тууралуу бир дагы жолу уккан эмесмин. Биз АКШнын аскер базасын өлкөдөн чыгаргандан кийин эле анын аты чыга баштады. Бул маселеде саясий боектор бар", — деди Атамбаев.
Ал ошондой эле Брюссель менен Нью-Йоркто отуруп алып сындагандан мурда жок дегенде соттук процесске катышып туруп анан пикир айтуу керек экенин белгиледи.
"Биз БУУдагы бардык кызыкдар тараптарды чакырганбыз. Соттук процесстин дээрлик көпчүлүгү ачык түрдө өттү. Күбөлөрдү суракка алуу гана жабык түрдө болду. Менин оюмча кайсы мамлекет болбосун соттун чечимин сыйлаш керек. Евробиримдик менен АКШ сыяктуу эле Кыргызстан дагы сыйга татыктуу", — деди Атамбаев.
Белгилей кетсек, ушул күндөрү Алмазбек Атамбаев Германияда иш сапары менен жүрөт. Буга чейин Брюселлде бир топ жолугушууларды өткөргөн.
Буга чейин айрым эл аралык уюмдар Аскаровду бошотуу талабы менен кайрылып, 2016-жылдын июль айында Германиянын канцлери Ангела Меркелден да Кыргызстанга болгон сапарында Аскаровду бошотууга жардам берүүсүн суранган. Сот Аскаровдун күнөөсү далилденгенин билдирди. Ал улуттар аралык жаңжалды козутуу, баш аламандык жана адам өлтүрүүгө катыштыгы бар деп айыпталган. Кийин жогорку сооттук инстанция Аскаровдун ишин кайрадан караган. Чүй облустук соту 2017-жылдын январында Азимжан Аскаровду өмүр бою эркинен ажыратуу боюнча чечимди күчүндө калтырган.
