Акылдуу эсептегичтерди көзөмөлдөп, тууралап туруу керек. Бул тууралуу Sputnik Кыргызстан агенттигине мурунку энергетика министри, КСДП фракциясынын депутаты Осмонбек Артыкбаев билдирди.
Белгилей кетсек, кыргызстандыктардын көбү "акылдуу" эсептегичтердин ишине нааразы болуп, "эсептегичтер ашыкча акчаны кошуп ийип жатат" деген пикирлер тараган.
"Негизи акылдуу эсептегичтер жакшы иштейт. Алар ар бир колдонулган киловатты эсептеп, маалыматтарды серверге жөнөтөт. Анын арты менен уурулуктар токтойт. Ал эми туура эмес эсептеп жатканы эсептегичтин ырастоосу бузулгандан болот. Аны адистер ар убак көзөмөлгө алып, тууралап турушу керек. Ошондо гана жакшы иштейт", — деди депутат.
Артыкбаев эсептегич энергетикадагы уурулукту жоё турган каражат экенин, өнүккөн өлкөлөр ушул эсептегичтерди колдонуп келерин кошумчалады.
