БИШКЕК, 26-янв. — Sputnik. Ноокат районуна караштуу Төөлөс айыл өкмөтүнүн Муркут айылында жаштар ашар жолу менен Уркуя Салиева атындагы көчөнү оңдоп чыгышты. Бул тууралуу Sputnik Кыргызстан агенттигине айылдын депутаты, ашардын демилгечиси Кыязбек Шарап уулу билдирди.
Анын айтымында, жолду оңдоого алты машина шагыл төгүлгөн.
"Биздин айылдан колхоздоштуруу учурундагы активист Уркуя Салиева чыккан. Биз ошол адамдын аты коюлган көчөнү оңдодук. Анткени кыш түшөөрү менен жолдун абалы өтө начарлап кетти. Демилгени колго алуу менен 1983-жылкы туулган достор ортодон акча чыгарып, айрымдары өзүлөрүнүн портер унаасын айдап чыкты. Анан ашар жолу менен жолду оңдодук. Эл тамак-ашын берип бизди колдоп жатты", — деди Шарап уулу.
Активист мамлекеттен жардам күтпөй эле, ынтымак менен көп маселелерди чечсе болорун кошумчалады.
