БИШКЕК, 26-янв. — Sputnik. Ошто жоокердин кокустан чыгарган огу улук лейтенанттын жамбашына барып тийгенин Улуттук гвардиянын маалымат кызматы билдирди.
Окуя Оштун №703ү аскер бөлүгүндө катталган.
"Улук лейтенант күзөт жайына октолгон тапанчаны таштап коюп, кагаз толтуруу менен алектенип жаткан. Бул учурда катардагы жоокер октолгон тапанчаны алып кокустан басып алган", — деп жазылат маалыматта.
Жыйынтыгында жоокердин колу чийилсе, тапанчанын огу улук лейтенанттын жамбашына барып тийген. Жабыркоочу Оштун улуттук госпиталына жаткырылган. Аталган факты боюнча учурда кызматтык тергөө иштери башталды.
