БИШКЕК, 20-янв. — Sputnik. АКШдагы шайлоодо жеңишке жетишкен Дональд Трамп ант берип, Американын президенттигине расмий түрдө киришти. Ошондой эле антты Трамптын орун басары Майк Пенс дагы берди.
Трамп өз антында Америка Кошмо Штаттары президентинин милдеттерин так аткарарын жана АКШнын Конституциясын сактоого колунан келген бардык аракетин жумшай турганын айтты.
Белгилей кетсек, 2016-жылы 8-ноябрда болгон президенттик шайлоодо республикачы Дональд Трамп демократ Хиллари Клинтонду жеңип алган.
Трамптын шайлоодо жеңишине нааразы болгон тараптар митингге чыгып, аны президент катары тааныбай тургандыктарын билдиришкен.
Ошентип Дональд Трамп АКШнын 45-президенти болуп калды. Учурда ал 70 жашта. Анын байлыгы Forbes журналынын эсеби боюнча 3,7 миллиард долларды түзөт. Ал жергиликтүү каналдардын бирине берген маегинде президенттин айлыгынан баш тарта турганын айткан.
