БИШКЕК, 14-ноя. — Sputnik. АКШга президент болуп шайланган Дональд Трамп айлыктан баш тарта турганын билдирди. Бул тууралуу РИА Новости жазып чыкты.
CBS телеканалынын "60 мүнөт" берүүсүндө Трампка "айлык аласызбы?" деген суроо узатылган.
"Менин жообум — жок. Мыйзам боюнча маяна алышым керек экен. Анын суммасы бир долларды түзөт", — деп билдирген Трамп.
АКШнын президентинин жылдык айлыгы 400 миң долларга жетет. Мындан тышкары америкалык лидердин жеке чыгымдары үчүн жылына 50 миң доллар бөлүнөт. Иш-сапардын чыгымдарына 100 миң доллар жана эс алууга 19 миң доллар берилет.
Бир жыл мурун саясат менен алектене баштаган Трамп ийгиликтүү бизнесмен катары таанымал. Forbes журналынын маалыматына караганда, анын байлыгы 3,7 миллиард долларды түзөт.
