БИШКЕК, 10-янв. — Sputnik. Кыргызстандын Тышкы иштер министрлиги Түркияда кыргыз кызын эки мекендеши сабаган деген маалыматты текшерип жатат. Бул тууралуу министрликтин маалымат кызматынан кабарлашты.
Буга чейин социалдык тармактарда канжалата сабалган кызды кордоп жаткандар анын тилин кесебиз деп коркутуп жаткан видео таркаган. Бул окуя эки күн мурда Измирде болгону айтылат.
Маалыматка караганда, жабыркоочу учурда иммиграциялык полицияда, ал эми паспорту менен телефону кордук көрсөткөн кыздар тарабынан жок кылынган.
Социалдык тармактын колдонуучулары укук коргоо органдарынан бул маселени тергөөнү талап кылып жатышат.
Ал эми КРдин Тышкы иштер министрлиги Түркиянын ТИМине тиешелүү билдирме жөнөтүлгөнүн кабарлады.
