Жогорку Кенештин чечими менен "Эйр Кыргызстан" авиакомпаниясы приватизациялана турган компаниялардын катарына киргенин башкы директору Жолдошбек Бектурганов Sputnik Кыргызстан агенттигине билдирди.
"Авиакомпанияга таандык акциянын 51 пайызы сатылышы керек болчу. Бирок мыйзам боюнча эгер инвестор чет элдик болсо, 49 пайызы гана берилет. Ошол программа менен инвестор издеп жатканбыз. Азыркы күндө "China Southern Airlines" деген кытай авиакомпаниясы келип, Транспорт министрлиги менен сүйлөшүүлөрдү жүргүзүп жатат. Өздөрүнүн ишмердүүлүгүн көрсөтүштү. Былтыркы жылдын көрсөткүчү боюнча эң көп жүргүнчү ташыган компания катары дүйнөдө биринчи орунга чыгыптыр. 700дөй учагы бар экен", — деди Бектурганов.
Анын айтымында, Кытай авиакомпаниясынын келиши менен "Эйр Кыргызстандын" авиапаркы 5-6 учакка толукталып, "Манас", "Ош" аэропортторунда хаб куруу мүмкүнчүлүгү ишке ашат.
