БИШКЕК, 28-дек. — Sputnik. КР ишкерлери үчүн Россия жана Белоруссиядан Казакстандын темир жолу аркылуу жүк ташуунун баасы арзандайт. Бул тууралуу өкмөттүн маалымат кызматы билдирди.
26-декабрда Санк-Петербургда Жогорку евразиялык экономикалык кеңештин жыйынындагы макулдашуулардын натыйжасында Алмазбек Атамбаев жана Нурсултан Назарбаев келишимге кол коюшту. Анда "Темир жол транспорту аркылуу жүк ташуу кызматтарынын тартибин жөнгө салуу, анын ичинде тарифтик саясат" каралган.
Документте Казакстандын аймагынан темир жол транспорту аркылуу жүк ташууда Кыргызстандан же Кыргызстанга бара жаткан жүктөргө унификацияланган тарифти колдонуу каралды. Ал тариф транзиттик тарифке салыштырмалуу арзан.
