БИШКЕК, 26-дек. — Sputnik. Кыргызстандын Мамлекеттик миграция кызматы менен Афганистандын Бадахшан провинциясынын администрациясынын ортосунда "Кичи жана Улуу Памирде жашаган этникалык кыргыздардын көйгөйлөрүн чечүүдө өз ара кызматташуу" боюнча Меморандумга кол коюлду. Бул тууралуу Миграция кызматынын маалымат кызматы билдирди.
Документке КРдин Мамлекеттик миграция кызматынын төрага орун басары Алмаз Асанбаев жана Афганистандын Бадахшан провинциясынын губернатору Ахмад Фейсал кол коюшту.
Афганистандын өкүлдөрү КРдин вице-премьери Чолпон Султанбекова, Жогорку Кеңештин депутаттары жана өкмөттүн Ош облусундагы ыйгарымдуу өкүлү Таалайбек Сарыбашев менен жолугушту.
Жолугушуунун алкагында Кичи жана Улуу Памирде жашаган этникалык кыргыздардын социалдык-экономикалык абалы, алардын билим жана саламаттык сактоо жаатындагы көйгөйлөрү, эки өлкө арасында кызматташууну өркүндөтүү сыяктуу маселелер талкууланды.
Афганистандык делегациянын жетекчиси Бикзат Ахмад Фейсал этникалык кыргыздардын социалдык абалын жакшыртуу актуалдуу маселелердин бири экенин белгиледи.
