БИШКЕК, 25-дек. — Sputnik. Кечээ Кыргызстандын Россиядагы элчилигинде жаш акын Самара Насырованын "Тагдырган тамган тамчылар" жана "Сезимдер тополоңу" жыйнактарынын бет ачаары болду. Бул тууралуу Sputnik Кыргызстан аталган мекеме билдирди.
Маалыматка караганда иш-чарага элчиликтин өкүлдөрү, КРдин Жазуучулар союзунун жооптуу катчысы Жылдыз Акаева жана жөн гана поэзия сүйгөн мекендештер катышты.
"Кечеге катышкандар Насырова өз ырларында адам баласынын жүрөгүндөгү сар-санааны ушунчалык жөнөкөй жана жеткиликтүү кылып бере алгандыктан, окурмандар арасында өтө тез жана жеңил кабыл алынаарын баса белгилешти", — деп айтылат билдирүүдө.
Насырова ыр жана прозалардан турган бир нече китептин автору. Анын чыгармачылыгынын негизги темасы – мекенге жана эне тилине болгон сүйүү.
Учурда Самара Насырова Москва шаарында жашайт.
