БИШКЕК, 23-дек. — Sputnik. Белгилүү Facebook социалдык тармагы Live Audio аттуу түз аудио уктуруу кызматын чыгара турганын айтып чыкты. Бул тууралуу социалдык тармактын жаңылыктар порталында маалымдалды.
Жаңы опция ушул жылдын апрель айында чыккан Facebook Live видеолорду түз алып көрсөтүү функциясына окшош.
Түз аудио уктуруу кызматы эң биринчи радиостанциялар жана үн контенти менен иштеген кызматтар үчүн арналган. Ошондой эле интернет-байланыштын ылдамдыгы төмөн болуп, видеону түз алып көрсөтүүгө мүмкүн болбогон аймактарда колдонуучулар бул кызматтан оңой пайдалана алышат.
"Кээде Facebook тармагында окуяларды видео менен эмес, үн аркылуу айтып берүүнү каалаган колдонуучулар болгондугун билебиз. Керек болсо айрым колдонуучулар аудиону түз уктуруу үчүн Facebook API кызматынын жардамы менен же видео түз алып көрсөтүүсү аркылуу видеонун ордуна сүрөт коюп колдонгондор болгон. Жаңы опция эми аудио эфир алып барууга мүмкүнчүлүк берет", — деп айтылат маалыматта.
Ошондой эле Facebook компаниясы жаңы кызматты алдыга жылдыруу үчүн өнөктөштөр пайда болгондугун белгилеген. Өнөктөш катары "Бүткүл дүйнөлүк Би-Би-Си кызматы" жана HarperCollins басма компаниясы бул демилгени колдоого алган.
Аталган функциянын авторлору жаңы опция 2017-жылдын башында кеңири колдонуучулар үчүн ишке киргизиле турганын айтышууда.
