БИШКЕК, 8-дек. — Sputnik. Россиянын Мамдумасынын депутаттары Вера Ганзя менен Тамара Плетнева кечки сегизге чейин иштөөгө нааразы пикирин билдирип, үйүндө күйөөлөрү ачка калып жаткандыгын айтышты. Бул тууралуу эл өкүлдөрү Мамдумадагы отурум учурунда билдиришти.
Төраганын биринчи орун басары Иван Мельников буга чейин депутаттар жума күнү 18 сааттан иштөө боюнча күн тартибин бекиткендигин, маселелерди кароо үчүн дагы бир күн — шаршембиде да кечке чейин иштөөгө туура келгенин айтты.
"Урматтуу төрага, бул маселелерди зарыл түрдө кароонун кереги жок. Кечке чейин иштеп ден соолукка зыян келтирип алышыбыз мүмкүн. Анткени залдагы жарыктандыруу менен таза абанын жетишсиздиги мындай график менен иштөөгө тоскоолдук жаратууда. Мындан сырткары үйгө кеч баргандыктан күйөөлөрүбүз ачка калып жатат", — деди Ганзя.
Ал эми төрага Вячеслав Володин регламентти депутаттар өзүлөрү бекиткендигин айтып, бир орунга 14 адам ат салышкандыгын эске салды. Спикердин орун басары Сергей Неверов шарт жакпай жатса мандаттарын тапшырып, кете берсе болоорун айтты.
