Кыргыз киносу 85 жашта: кадр маселеси эмнеге дагы деле актуалдуу?
19:04 17.09.2026 (Жаңыртылды: 19:16 17.09.2026)
Кыргыз киносу 85 жашта: кадр маселеси эмнеге дагы деле актуалдуу?
Жазылуу
Коноктор
Стамбулбек Мамбеталиев, Режиссёр, оператор, Кыргыз-Түрк "Манас" университетинин радио, ТВ жана кино бөлүмүнүн ага окутуучусу
1941-жылдын 17-ноябры кыргыз киносунун түзүлгөн күнү. Быйыл улуттук кинематографияга 85 жыл толуп жатат. Бул маанилүү мааракеге карата өлкө боюнча ар кандай маданий иш-чаралар, китептердин бет ачарлары жана сынактар өткөрүлүүдө. Ал эми бул жолку "Стоп кадр" программасында кыргыз киносунун келечегин аныктай турган негизги маселелердин бири — кадр тууралуу кеп кылдык. Бүгүн кино тармагында адистер жетиштүүбү? Аларга билим берүүдө кандай кемчиликтер бар? Эмне үчүн дүйнөгө кыргыз киносун тааныта турган режиссёрлорду жана кино адистерин көбүрөөк чыгара албай жатабыз? Бул жана башка суроолорго жоопту режиссёр, оператор, Кыргыз-Түрк "Манас" университетинин радио, телевидение жана кино бөлүмүнүн ага окутуучусу Стамбулбек Мамбеталиев менен маектен издейбиз. Анын айтымында, бүгүнкү күндө өлкөдө киноинфраструктураны жакшыртууга көңүл бурулуп жатат. Бирок заманбап техниканы жана жаңы мүмкүнчүлүктөрдү иштетип, тармакты алдыга сүрөй турган татыктуу кадрлар даярдалбаса, жасалган аракеттердин баары эле күткөн натыйжаны бере бербейт. Стамбулбек Мамбеталиев киноинфраструктураны өнүктүрүү менен катар аны улантып, иштетип, жаңы деңгээлге чыгара турган адистерди тарбиялоо өзгөчө маанилүү экенин белгиледи. Ошондой эле кесиптик билим алып, кинонун тилин жана мыйзам ченемдерин терең өздөштүргөн режиссёрлордун тасмаларынын өмүрү узагыраак болорун, ал эми билими жок тартылган тасмалардын экрандагы өмүрү кыска болушу мүмкүн экенин кошумчалады. Демек, кыргыз киносунун келечеги бир гана камерада же техникалык мүмкүнчүлүктө эмес — ошол камераны ким кармап, экранга кандай окуяны алып чыгат деген суроодо.
