БИШКЕК, 29-ноя. — Sputnik. Россиядагы Кыргызстандын элчилиги Москванын мэри Сергей Собяниндин билдирүүсүнө расмий жооп берди.
Дүйшөмбү күнү Москванын мэри ЕАЭБ мамлекеттеринен келген мигранттар, айрыкча кыргызстандыктар, "шаарга коопсуздукту кошуп бербегени" тууралуу билдирген. Анын айтымында, алар эмгек келишимдерин түзбөйт да, салыктарды төлөшпөйт.
Кыргызстандын жарандары каттоого турууда, ошондой эле алар менен мыйзамдуу эмгек келишим түзбөө маселелери боюнча кыйынчылыкка дуушар болуп жатканын КР элчилиги танбайт.
"Мыйзамсыз миграциядан арылуу үчүн кара ниеттүү жумуш берүүчүлөрдүн да жоопкерчилигин көзөмөлдөө зарыл. Россиянын эмгек кодексин бузуу менен алар салык төлөөдөн жана мигранттарды жумуш орду боюнча каттоодон баш тартышууда", — деп КР элчилиги билдирүүдө.
Мындан сырткары элчилик ЕАЭБ жана эки тараптуу кызматташтыктын алкагында бул маселе боюнча өз сунуштарын бере тургандыгын кошумчалады.
