БИШКЕК, 2-ноя.— Sputnik. Алматынын райондор аралык кылмыш иши боюнча соту он адамды өлтүрдү деп шектелип жаткан Руслан Кулекбаевди күнөөлүү деп таап, өлүм жазасына тартуу чечимин чыгарды. Бул тууралуу Sputnik Казакстан агенттиги жазып чыкты.
Эске салсак,18-июль күнү куралчан топ Алматыдагы полиция кызматкерлерине кол салып, он киши каза болгон. Атайын операция учурунда шаарга кооптуулуктун "кызыл" деңгээли жарыяланган. Кол салган киши ошол эле күнү кармалып, анын Кызыл-Ордо облусунун буга чейин эки жолу соттолгон 26 жаштагы Руслан Кулекбаев экени аныкталган. Президент Нурсултан Назарбаев болуп өткөн окуяны "теракт" деп атап, Улуттук коопсуздук кызматы буга чейин абакта кармалган Кулекбаев салафиттер менен байланыш түзгөнүн маалымдаган.
"Руслан Кулекбаев өлүм жазасына тартылсын", — деди сот өкүм чыгарып жатып.
Соттук отурумда Кулекбаев бир нече полиция кызматкерин жана жарандарды өлтүргөнүн мойнуна алган. Анын айтымында, маркумдар "туура эмес жолго түшүп алышкан". Ошондой эле ал күч түзүм өкүлдөрүн өлтүргөнүнүн себебин мусулман бир туугандарын куугунтуктагыны менен байланыштырды.
Казакстанын президенти 2003-жылы өлүм жазасына мораторий киргизүү боюнча жарлыкка кол койгон. Жарлык чыккан соң, өлүм жазасына тартуу токтотулуп, анын ордуна 2004-жылдан баштап өмүр бою эркинен ажыратуу жазасы киргизилген. Бирок сот өлүм жазасына тартуу боюнча чечим чыгарууга укуктуу.
