БИШКЕК, 4-сен. — Sputnik. Президент Алмазбек Атамбаев бүгүн өлкөнүн Куралдуу күчтөрүнүн Башкы штабынын башчысы Раимберди Дүйшөнбиевди кабыл алып, КР куралдуу күчтөрүнүн аскерий жөндөмүн арттыруу зарылдыгын баса белгиледи. Бул туурасында мамлекет башчынын маалымат кызматы кабарлады.
"Жолугушууда Атамбаев өлкөнүн Куралдуу күчтөрүн андан ары өнүктүрүү жана чыңдоо, чек ара коопсуздугун камсыз кылуу боюнча жүргүзүлүп жаткан иштер жана мамлекеттик чек араны коргоону күчөтүү иш чаралары тууралуу маалымат алды", — деп айтылат таратылган кабарда.
Президент мамлекеттин сырткы чектерин бекемдөө, коргоо жөндөмдүүлүгүн күчөтүү боюнча коюлган милдеттерди натыйжалуу чечүү үчүн Куралдуу күчтөрдүн аскерий жөндөмүн, мобилдүүлүгүн мындан ары да арттыруу зарылдыгын баса белгилеген.
