БИШКЕК, 3-окт. — Sputnik. Кыргызстандын президенти Алмазбек Атамбаев 13 күндөн кийин, бүгүн жумушка чыгып, Коргоо кеңешинин катчысы Темир Жумакадыровду кабыл алды. Бул туурасында өлкө башчынын маалымат кызматы билдирди.
Жолугушуу учурунда президент улуттук коопсуздукту камсыздоо боюнча мамлекеттик органдар тарабынан көрүлүп жаткан иштер тууралуу кабардар болду.
"Жумакадыров президентке чек ара көйгөйүн чечүүгө багытталган чаралар тууралуу маалымат берди", — деп айтылат билдирүүдө.
Атамбаев Коргоо кеңешинин катчысы менен укук коргоо органдарын реформалоо, коррупция менен күрөшүү жана өлкөдөгү диний кырдаалды талкуулады.
Мындан 13 күн мурда 19-сентябрда Нью-Йоркто өтүүчү БУУнун Башкы Ассамблеясынын сессиясына баратып, Стамбулдан өзүн жаман сезип, аба майдандан аны Тез жардам алып кеткен. Андан соң Түркиянын Измир шаарындагы мейманканалардын бирине жайгашкан. Ал эми 23-сентябрда өлкө башчысы ден соолугун чыңдоо үчүн Москва шаарына учуп келген болчу.
Атамбаев ишемби күнү, 1-октябрда Кыргызстанга кайтып келген.
