БИШКЕК, 26-сен. — Sputnik. Жогорку Кеңештин биринчи кабатындагы бөлмөлөрдүн биринде түтүн чыгып, ал маалында өчүрүлгөнүн парламенттин маалымат кызматынын жетекчисинин орун басары Канат Курманбеков Sputnik Кыргызстан агенттигине билдирди.
Маалыматка ылайык, түтүн компьютер сайылган узарткычтардан чыккан.
"Электр зымдарынын чыңалуусунан түтүн пайда болгон, эч кандай өрт чыккан эмес. Убагында өрт өчүрүүчүлөр менен биздин электрик кызматкерлер келип, кырдаалды жөнгө салды", — деди ал.
Курманбеков түтүндөн эч ким жабыр тартпаганын, учурда абал тынч экенин, кызматкерлер кадимки шартта иштеп жатканын кошумчалады.
