БИШКЕК, 11-сен. — Sputnik. Үйүнөн тогуз миллиард рубль табылган Россиянын ИИМнин полковниги Дмитрий Захарченконун адвокаты сотто 70 миллион күрөө сунуштагандыгы тууралуу РИА Новости жазып чыкты.
Ишемби күнү Москванын соту ИИМдин антикоррупция боюнча жетекчиси Дмитрий Захарченконун ишин караган. Полковник Кылмыш жаза кодексинин үч беренеси боюнча айыпталып жатат: "чоң көлөмдөгү пара алуу", "кызматтык ордун кыянаттык менен пайдалануу", жана "тергөөчүнүн ишине тоскоолдук көрсөтүү".
Сотто тергөөчү Захарченконун батиринен 120 миллион доллар менен эки миллион евро жалпы тогуз миллиард рубль табылганын ырастаган.
"Сотко күрөө катары 70 миллион рубль сунуштайм", — деп Захарченконун адвокаты Юрий Новиков билдирди.
Бирок сот тергөөчүнүн өтүнүчүн канааттандырып полковникти 8-ноябрга чейин камакта калтыруу чечимин чыгарды.
Тергөөчүнүн маалыматына караганда Дмитрий Захарченко пара алып жүргөн. Ал эми анын бир жылдык кирешеси үч миллион рублды түзгөн.
