БИШКЕК, 5-сен. — Sputnik. Кыргызстандын атынан "Жаңы толкун-2016" эл аралык музыкалык конкурска катышып жаткан ырчы Нурсултан Азыкбаев биринчи күндүн жыйынтыгы менен экинчи орунга татыды. Бул тууралуу конкурстун расмий сайтында жарыяланды.
Биринчи күнү ал британиялык ырчы Стингдин "Shape of my heart" ырын аткарды. Калыстар кыргызстандык ырчыга жалпысынан 142 упай берген. Азыкбаев биринчи орунду алган украиналык ырчы Галина Безруктан бир упай гана артта калган.
Конкурстун экинчи күнү, 6-сентябрда Азыкбаев россиялык ырчы Григорий Лепс менен дуэт ырдайт. Үчүнчү этапта өзүнүн "Аттиң ай" ырын көрүүчүлөргө сунуштайт.
21 жаштагы Нурсултан Азыкбаев Муратаалы Күрөңкөев атындагы мамлекеттик музыкалык училищесинде үчүнчү курста окуйт.
"Жаңы толкун- 2016" эл аралык музыкалык конкурсуна 16 мамлекеттин өкүлдөрү катышууда.
