БИШКЕК, 2-сен. — Sputnik. Өзбекстандагы Самарканд аэропорту ишемби күнү бир дагы учуп-конууларды кабыл албайт. Бул тууралуу Sputnik Өзбекстан маалымат агенттиги АКШнын Жарандык авиация башкармалыгына таянуу менен билдирди.
"Аэропорт учактарды кабыл албайт жана ал жактан эч бир учак чыкпайт. Болгону мурда бул датага расмий түрдө пландалган гана учактар коно алат", — деп айтылат АКШнын Жарандык авиация башкармалыгы тараткан билдирүүдө.
Самарканд Өзбекстандын президенти Ислам Каримовдун туулган жери болуп эсептелет.
Жума күнү Өзбекстандын өкмөтү өлкө президенти Каримовдун мээсине кан куюлуп оор абалда ооруканага жаткырылганын билдирген. Ал эми Рейтер агенттиги өз булактарына таянуу менен Өзбекстандын президенти каза болгонунмаалымдаган. Азырынча өзбек бийлиги Каримовдун ден соолугуна байланыштуу маалыматтарга түшүндүрмө бере элек.
