БИШКЕК, 29-авг. — Sputnik. Бишкекте Германиянын Тышкы иштер министрлигинин саясий архивинен табылган кыргыздар жөнүндөгү документтердин бет ачары өттү. Бул туурасында Мамлекеттик каттоо кызматынын Архив агенттиги билдирди.
Документти немис архивинен кыргызстандыктардын Германиядагы "Манас" коомунун мүчөсү, тарых илимдеринин кандидаты Чынара Исраилова-Харьехузен таап чыккан.
Тарыхчы документте XIX кылымдын экинчи жарымынан 1918-жылга чейинки окуялар камтылгандыгын айтты.
"Документтер байыркы немис тилинде жазылгандыктан, учурда аны орус тилине которуу зарылдыгы турат", — деп айтылат Архив агенттиги жиберген маалыматта.
Тарыхчы буга чейин аталган документтердин басымдуу бөлүгү 1916-жылдагы Үркүн тууралуу экенин айткан.
Архивдик документтерди берүү Кыргызстан жана кыргыздар туурасында чет жактарда материалдарды, документтерди чогултуу максатында иштеп жаткан мамлекеттик программанын алкагында жүргүзүлгөн.
