БИШКЕК, 27-авг. — Sputnik. Москва шаарындагы өрт чыккан басмаканада каза болгондор Кыргызстандын жарандары экендиги такталды. Бул тууралуу Россиянын ӨКМинин Москва шаары боюнча жетекчиси Илья Денисов билдирип, окуянын чоо-жайын айтып берди.
"Өрт биринчи кабаттагы кампадан чыккан. Ал заматта лифт менен экинчи кабатка жетип, ал жердеги тез күйүүчү заттар өрттүн күч алышына себепкер болгон. Ошол учурда кийим алмаштыруу жайдагы 16 адам каза болгон. Алардын бардыгы Кыргызстандын жарандары болгону такталды", — деди Илья Денисов.
Эске сала кетсек, Москва шаарынын Алтуфьевское шоссе жайгашкан басмаканада өрт чыккан. Окуяга күбө болгондордун айтымында өрт чыккан имараттын ичинде кеминде 17ге чукул киши калып калган. Алардын арасында жаш улан-кыздар жана кош бойлуу келин калып кеткендиги айтылууда.
