БИШКЕК, 18-июл. — Sputnik. Ноокен районундагы Ак-Бата айылында ичимдиктин айынан классташын өлтүрүп, сөөктө өзүнүн чарбагына көөмп салган жаран кармалды. Бул туурасында Жалал-Абад облустук ички иштер башкармалыгынан билдиришти.
14-июль күнү 56 жаштагы жаран 25 жаштагы баласы 10-июль күнү кечинде үйдөн чыгып кеткен бойдон кайра кайтып келбегендигин айтып, арыз менен кайрылган.
Анын негизинде милиция кызматкерлери тарабынан ыкчам-иликтөө иштери жүргүзүлүп дайынсыз жоголгон кишинин денеси досунун чарбагынан табылды.
"10-июль күнү 25 жаштагы М.Т. классташы менен арак ичип отуруп урушуп кеткен. Натыйжада, үйдүн кожоюну А.К. аттуу жаран классташын башка таяк менен бир нече ирет уруп, анын кесепетинен "конок" өлүп калган. Кылмышка шектелген жаран маркумдун денесин чарбагына сүйрөп барып көөмп койгон", — деп айтылат маалыматта.
Кылмышка шектелип жаткан жаран күнөөсүн толук мойнуна алып, камакка отургузулду. Тергөө иштери уланууда.
