БИШКЕК, 15-июл. — Sputnik. Борбордук "Ала-Тоо" аянтында 31-августта улуттук бийлер бийленип, улуттук кийимдердин флэш-мобу өтөт. Бул туурасында Тарых жана маданият жылын даярдоо жана өткөрүү боюнча Мамлекеттик дирекциянын маалымат кызматынан кабарлашты.
Бул иш-чараны аталган дирекциянын колдоосу менен "Ак элечек айымдар" коомдук бирикмеси уюштурууда.
"10 жаштан 15 жашка чейинки кыз балдар улуттук көйнөк, кемсел, топу менен чыгышса, 15 жаштан 18 жашка чейинки кыздар кыз такыя, кемсел көйнөк менен бийлешет. Ал эми 18 жаштан 20 жашка чейинки кыздар кеп такыя, кемсел көйнөк менен, 20 жаштан 25 жашка чейинки жаштар шөкүлө, кемсел көйнөк кийишет", — деп билдиришти маалымат кызматынан.
25 жаштан 30 жашка чейинки айымдар келин элечекти, 30 жаштан 50 жашка чейинкилер айым элечекти, 50 жаштан жогорку байбичелер байбиче элечекти даңазалашат.
"Ак элечек айымдар" коомдук бирикмеси бул демилге менен байыркы улуттук баш кийимдерди жайылтып, этно маданиятты өркүндөтүү максатын көздөрүн билдиришет.
