БИШКЕК, 14-июл. — Sputnik. Балыкчы шаарынын тургундары туристтик сезон башталган маалда Чолпон-Ата шаарына түз өтчү негизги жолдун жабылышына нааразы. Алардын айтымына караганда аталган кан жолдун жабылганына бир айдай болуп калды. Бирок, жергиликтүү тургундар оңдоо иштери жай жүрүп жатканын айтышууда.
Ал ортодо жолдун жабылганын Балыкчы шаарынын мэриясы тастыктап, эмне себептен жолду оңдоо создуктурулуп жатканына маалымат кызматы түшүндүрмө берди.
"Шаарды аралап Чолпон-Ата шаарына түз өтчү Абдрахманов көчөсү оңдоо иштеринен улам толугу менен жабылды. Алгачкы долбоор боюнча жолдун асфальтынын биринчи гана катмары алынып, кайра төшөлмөк, бирок жол 30 жылдан ашык убакыттан бери оңдолбогондуктан аны толук оңдоо каралган. Бул жол республикалык маанидеги жол болгондуктан көзөмөлдөө иштери Транспорт жана жолдор министрлигине карайт", — деп мэриянын маалымат кызматы билдирди.
Маалыматка ылайык, жолду толук оңдоо август айынын ортосуна пландалган.
Балыкчы шаарынын мэриясы келтирилген оңтойсуздук үчүн жергиликтүү тургундарды түшүнүү менен кабыл алууга чакырды.
