Атамбаев "Кайран элим, кайда баратабыз?" баннерин өлкөгө жайылтууга акча бөлүнөрүн айтты

БИШКЕК, 14-июл. — Sputnik. Алмазбек Атамбаев президенттик аппаратынын жетекчисине улуттук кийимчен жана паранжа кийген кыздардын сүрөттөрү тартылган баннерди жалпы республикага жайылтуу үчүн каражат бөлүү тапшырмасын бергенин билдирди. Өлкө башчысы мындай пикирин Германиянын канцлери Ангела Меркель менен биргеликте берген маалымат жыйында билдирди.

Белгилей кетсек, буга чейин Бишкек шаарынын борбордук бөлүгүнө улуттук жана паранжа кийген кыздардын сүрөтү түшүрүлүп, алды жагына "Кайран эл кайда баратабыз?" деген баннер илинип, ал коомчулуктун талкуусуна кабылган. Алардын айрымдары түндө чечилген болчу.

"Арабдын, пакистандын жана башкалардын маданиятын аралаштырбайлы. Бул башка элдин маданиятын таңуулоо. Керек болсо биздин сөздөрдү да алмаштырууну каалашууда. Мурда адал деп келсек, эми халаль дешибиз керек экен. Башка элдин маданиятын таңуулоо болбошу керек", — деди Атамбаев.

Президент Кыргызстандын эли миңдеген жылдар бою өзүнүн маданиятын сактап келгенин, эми динди жамынып алып башка маданиятты таңуулап жатканын кошумчалады.

"Мындай баннерлер керек. Ал жакта эч кандай таңуулоо жок. Болгону үч сүрөт турат дагы ылдый жагына "Кайран эл кайда баратабыз?" деп эле жазылып турат. Мындай баннерлерди сыйрып жаткан кишилер башка пикирлерди уккулары келбейт. Бардыгы кийимден, тилден башталат. Андан кийин баш кесмей башталат. Мындай аракеттердин ислам менен эч кандай тиешеси жок. Ислам тынчтыктын жана жакшылыктын дини. Биздин мамлекет көз карандысыздыгын алгандан бери динди караган эмес. Көп нерсени өткөрүп жибердик. Мына үч жыл мурун гана дин тармагы боюнча конкреттүү концепцияны кабыл алып, иш алып бара баштадык", — деди ал.

Кыргызстан светтик өлкө экенин айткан президент маданиятты, мамлекетти, тил менен кийимди дагы коргоо эң башкы нерселерден экенин баса белгиледи.