БИШКЕК, 8-июл. — Sputnik. Ысык-Көлгө бараткан жолдо россиялык туристтерди тоноого шектелип мурунку милиция кызматкерлери кармалганын Sputnik Кыргызстан агенттигине укук коргоо органдары билдирди.
Буга чейин Дмитрий жана Ирина Ребровдордун үй-бүлөсү милицияга кайрылып, Токмоктун жанындагы айланма жолдон өздөрүн милиция кызматкерлери деп тааныштырган жарандар карактап кеткенин айтышкан. Окуя 4-июль күнү болгон. Жубайлар майып баласын Ысык-Көлгө дарылоо үчүн алып келе жатышкан.
"Эки шектүү киши кармалып, алардын буга чейин укук коргоо органдарында иштеп келгени аныкталды. Калган маалымат тергөөнүн кызыкчылыгы үчүн ачыкка чыгарылбайт", — деди булак.
Бул маалыматты ИИМ басма сөз кызматынын өкүлү Эрнис Осмонбаев тастыктап, Facebook баракчасына "россиялык туристтерди карактагандар кармалды" деп жазды.
Аталган окуяны премьер-министр Сооронбай Жээнбеков, ИИМ башчысы Кашкар Жунушалиев жана Чүй ОИИБ жетекчиси Капар Батырканов жеке көзөмөлүнө алган.
