БИШКЕК, 6-июл. — Sputnik. Үстүбүздөгү жылдын 1-июлунан тартып Бишкектин 477 дарыгери айлыгынан тышкары кошумча 4000 сомдон аларын мэрия билдирди.
Бишкектин мэриясы шаардык кеңештин кароосуна "Тез жардам станция жумушчусунун депозити" жана "Педиатр-дарыгердин депозити" токтом долбоорлору коюлуп, колдоо тапкан.
"Тез жардам кызматын пайдалангандардын саны жылдан жылга өсүп жатат. Депозитке карабастан бул тармактан адистердин агымы да байкалууда. Иштен кетүүгө айлык акынын төмөндүгү (5000 сом), жумуштун оордугу жана акыркы кезде дарыгерлерге бейтаптар жана алардын туугандары тарабынан кол салуу фактылары көбөйүп жатканына байланыштуу", — деп айтылат билдирүүдө.
Ал эми аталган депозит менен иштеп жаткан дарыгерлер келишим мөөнөтү аяктаганга чейин жумушун уланта берет.
