БИШКЕК, 23-июн. — Sputnik. Бүтүрүү кечесин өткөрүүгө тыюу салынгандыгы тууралуу Sputnik Кыргызстан агенттигине Билим берүү министрлигинен билдиришти.
23-июнь күнү өлкөнүн бардык мектептеринде бүтүрүүчүлөргө аттестат ыйгарылат.
"Билим берүү министрлигинин буйругунда бүтүрүү кечесин күндүз жана кечинде мектепте, жаратылышта жана көңүл ачуучу жайларда өткөрүүгө тыюу салынган. Кече уюштурууга акча чогулткан мугалимдерге тартиптик чара көрүлүп, жумуштан бошотулушу ыктымал", — деп билдирди ведомствонун маалымат кызматы.
ИИМдин өспүрүмдөр менен иш алып барган бөлүмүнүн жетекчиси Азамат Абдрахманов бүгүн мектеп менен 63 миң бүтүрүүчү коштошо турганын билдирди. Ал коомдук тартипке 3,5 миң милиция кызматкери көзөмөл кыларын белгиледи.
"Эгер ата-энелер жоопкерчиликти толугу менен моюндарына алышса бүтүрүү кечесин кафе, ресторандарда өткөрүүгө болот. Алар имараттын ичиндеги тартипти көзөмөлдөшсө, биз сыртты көзөмөлгө алабыз", — деп белгиледи Абдрахманов.
ИИМдин өкүлү ээнбаштык кылгандарга чара көрүлөрүн кошумчалады.
