БИШКЕК, 20-июн. — Sputnik. Кыргызстандын түштүк борбору менен Казакстандын Тараз шаары өз алдынча кызматташмай болгону тууралуу Ош мэриясынын маалымат кызматы билдирди.
Адис Жылдыз Бурканованын айтымында, Ош шаарынын мэри Айтмамат Кадырбаеав башында турган делегация 16-17-июнь аралыгында Тараз шаарына барып, аким Нуржан Календеров менен жолугушту. Эки тарап кызматташуу боюнча протоколго кол коюшту.
Тараз шаарынын акими облустук борбордун социалдык-экономикалык өнүгүшү жана Кыргызстан менен ар кайсы багыттагы шериктештиги тууралуу маалымат берди.
"2015-жылы Жамбыл облусунун Кыргызстан менен болгон соода жүгүртүүсү 6,6 миллион долларды түздү. Үстүбүздөгү жылдын биринчи кварталында эле биздин облуска 2,4 миллион долларлык товар импорттолуп, 2,7 миллиондук товар экспорттолду", — деп билдирди Календеров.
Ал эми Кадырбаев Кыргызстан менен Казакстандын тышкы соода жүгүртүүсү 905 миллион долларды түзсө, анын ичинде Ош шаарыныкы 13,3 миллионду түзөрүн билдирген.
"Биз президент Нурсултан Назарбаевге казак тараптын каржылоосу менен мектеп-интернат куруу боюнча чечимине ыраазычылык билдиребиз. 2010-жылкы трагедияда Ош шаарында үйлөр гана эмес мектептер дагы талкаланган болчу", — деп билдирди Кадырбаев.
Эки тараптуу жолугушуунун алкагында мэр кесиптешин 5-октябрда өтө турган Ош шаарынын күнүнө чакырды. Ал үч миң жылдык Ош шаары миң жылдык Тараз шаары менен тыгыз кызматташып, эки тараптын мамилесинин өнүгүшүнө бардык аракеттерди жумшай тургандыгын кошумчалады.
