Тили "орусча чыгып", кыргызчаны үйрөнүп кеткен атка минерлер

Sputnik Кыргызстан агенттиги бул жолкусунда тили орусча чыгып, өжөрлүгү менен кыргыз тилин өздөштүрүп алгандарды тизмектеп көрдү. 

1. Кыргыз тилин бат үйрөнүп алкгандардын сап башында Жогорку Кеңештин эки жолку депутаты Дастан Бекешов турат. Ал буга чейин парламенттин трибунасында орусча сүйлөп, мыйзамдарды расмий тилде жазып келсе, учурда кыргызча түш жоруп калды. Акыркы жылдары парламентте дээрлик расмий тилде сүйлөбөй, жалаң гана кыргыз тилинде сүйлөп келүүдө. Дастан мырза, баракелде!
2. Бишкектин мурунку мэри, экс-премьер министр Феликс Кулов көп жылдан бери чоң кызматтарды аркалап келгендиктен ар убак көңүл борборунда. Кичинекей кезибизде экс-депутаттын сыналгыдан орусча гана сүйлөгөнүн көрсөк, 2010-жылдагы парламенттик шайлоодо кыргызча сүйлөп чыкканын көрүп ыраазы болгонбуз. Башка түшсө байтал жорго болот эмеспи.

Интеллектуалдык деңгээли жогору, өтө кичи пейил атка минер деп эсептелген Жоомарт Оторбаевдин да тили орусча чыкканы эч кимге сыр эмес. Бирок Жоомарт мырза үзөңгүлөштөрүнүн сынына кабылгысы келбедиби же чын эле жан үрөп аракет кылдыбы, айтор кыргыз тилин өздөштүрүп кеткендердин катарынан орун алды. Та"к"алып, та"к"алып сүйлөсө да депутаттардын сынына кыргызча жооп берип келди. 

Жогорку Кеңештин депутаты Галина Скрипкина парламентте өзүнүн активдүүлүгүн көрсөтүп келет. Ал ар убак расмий тилде сүйлөгөнү менен кыргызчаны беш колдой түшүнөт. Депутат кыргызча мыйзам жазбаса да, талкуу учурунда кыргызча сүйлөп калмайы бар. 

Кыргызстандын мурунку өкмөт башчысы, Ош облусунун экс-губернатору Амангелди Муралиев да алгач расмий тилде гана сүйлөчү. Ар кыл сындардан улам кыргыз тилин үйрөнүп, кийинчерээк кыргызча буйрук берип калганы бар.

Тил үйрөнүү баарынын эле колунан келе бербейт. Мейли премьер-министр, мейли депутат болуңуз, жан дилиңиз менен билек түрө киришпесеңиз болбойт. 

Кыргыз тилин өздөштүргөндөрдүн тизмеги мунун менен бүтпөйт. Кийинки материалды кыргыз тилин үйрөнүп кеткен башка улуттун өкүлдөрүн атайбыз.