БИШКЕК, 2-июн. — Sputnik. Sputnik Кыргызстан маалымат агенттигинин фотокабарчысы Табылды Кадырбеков ADME PHOTO AWARDS 2016 сүрөт конкурсунда үчүнчү орунду камсыз кылды. Бул тууралуу adme.ru порталында маалымдалат.
Конкурска 4419 сүрөт келип түшкөн, анын ичинен калыстар эң мыкты делген 36 сүрөттү тандап алышкан.
Мыкты эмгектерди тандоодо уюштуруучуларга фотографтар Катерина Плотникова, Александр Петросян, Олег Оприско, Александр Яковлев жана Кирилл Умрихин жардам беришкен.
Биринчи орунду 10 фотограф алып, алардын ар бирине 50 миң рублдан сыйлык берилет.
Экинчи орунга 13 сүрөтчү татып, ар бири 40 миң рубль менен сыйланат.
Үчүнчү орунду 12 фотограф алды. Алардын катарында Табылды Кадырбековдун "Быйтык" (Смайлик) сүрөтү да бар. Коло байгеге татыган ар бир фотограф 30 миң рублдан алышат.
Кадырбеков конкурска эки сүрөтүн эки ай мурун жибергенин айтты. Алардын бирөө кыска тизмеге кирбей калган.
"Бул конкурска катышып, үчүнчү орунду алганыма абдан кубанычтамын. Өз ишимди жана кесибимби жакшы көрөм", — дейт ал.
Sputnik (sputniknews.com) — ондогон өлкөлөрдө мультимедиялык маалыматтык хабдарга ээ маалымат агенттиги жана радио. Sputnik өзүнө сайттарды, аналогдук жана санарип радиоберүү, социалдык тармактарда баракчаларды камтыйт. Sputnik маалымат түрмөгүнө жазылгандар үчүн англис араб, испан жана кытай тилдеринде кабарлар күнү-түнү жаңыланып турат.
