БИШКЕК, 31-май — Sputnik. Баткен облусунун Кадамжай районунун сел жүргөн аймактарында санитардык тазалоо иштери аткарылууда. Бул тууралуу ӨКМдин маалымат кызматы билдирди.
Жарандык коргонуу комиссиясынын маалыматы боюнча 238 турак үй иликтенип, анын ичинен 84 турак үйдүн ичине суу кирген. Төрт турак жай авариялык абалда болуп, үч үй капиталдык ремонтко муктаж экени аныкталды.
"Райондук ооруларды алдын алуу жана санитардык эпидемиологиялык көзөмөлдөө борбору тарабынан 7 топ түзүлүп 3 даана техника менен селден жабыркаган 240 турак үйдү кыдырып чыгышты. Ар кандай жугуштуу оорулардын алдын алуу максатында хлор акиташы менен дезинфекция иштерин жүргүзүшүүдө", — деп айтылат маалыматта.
Учурда сел бузган имараттарды жана курулуштарды калыбына келтирүү аракеттери улантылууда.
