БИШКЕК, 30-май — Sputnik. Кадамжай районунун Жийделик айылында жүргөн селден улам дайынсыз болгон үч жаштагы бала табыла элек. Бул тууралуу ӨКМ билдирди.
Баланы табуу үчүн 83 куткаруучу тартылган.
Эске сала кетсек, үстүбүздөгү жылдын 27-май күнү Жийделик участкасында тынбай жаан жаап катуу, сел жүргөн. Анын кесепетинен 11 унааны суу агызып, бир машина сайга кулап кеткен. Ичиндеги төрт чоң киши жана эки жаштагы бала каза болгон. Дагы бир алты жаштагы баланы куткаруучулар сактап калууга үлгүргөн.
Ал эми сел агызып кеткен унаа ичинде дагы бир үч жашар бала болгону айтылып, куткаруучулар издөө иштерин улантууда.
Буга чейин баланын кийимдери дарыя жээгинен табылганы белгилүү.
Учурда кырсык кесепеттерин жоюу иштери жүрүп жатат.
