Ош шаарынын мэриясы селге кабылган Кадамжайлыктарга гуманитардык жардам жөнөтөт

БИШКЕК, 29-май — Sputnik. Ош шаарынын мэриясы Баткен облусунун селден жапа чеккен Кадамжай районунун жашоочуларына гуманитардык жардам жөнөтөт. Бул туурасында Ош шаарынын мэриясынын өкүлү Замир Юсупов кабарлады.

Кадамжай районун жашоочулары 27-майда Ош — Айдаркен автожолунда жүргөн селден жабыркап, беш адам каза болгон. Ал эми кечээ тоо жылгаларынан 3-4 жеринен кайрадан сел жүрүп, бир топ материалык чыгып алып келген. 

Мэрия өкүлүнүн айтымында, табигат кырсыгынан жапа чеккендерге гуманитардык жардам жүктөлгөн эки КамАЗ жөнөтүлөт.

"Жүктүн жалпы көлөмү 550 миң сомго чукулдап, 20 тоннаны түзөт. Жабырлануучуларга азык-түлүк — ун, кесме, күрүч, суу май жана кант жеткирилет. Андан сырткары биринчи жардам көрсөтүүгө зарыл болгон каражаттар да жөнөтүлөт", — деди Юсупов.

Ал жардам жүктөлгөн автоунаалар Кадамжайга эртең менен жөнөп кете тургандыгын кошумчалады.

27-май күнү Жийделик участкасында тынбай жамгыр жаап, катуу сел жүргөн. Анын кесепетинен 11 унааны суу агызып, бир машина сайга кулап кеткен. Анын ичиндеги төрт чоң киши жана эки жаштагы бала каза болгон. Дагы бир алты жаштагы баланы куткаруучулар сактап калууга үлгүргөн. Ал эми сел агызып кеткен унаа ичинде дагы бир үч жашар бөбөк болгону айтылып, куткаруучулар издөө иштерин улантууда.

Президент Алмазбек Атамбаев селден каза болгондордун үй-бүлөсүнө 100 миң сомдон бөлүп берди. Кечээ эртең менен окуя болгон жерге өкмөт башчы Сооронбай Жээнбеков жана президенттин кеңешчиси Икрамжан Илмиянов жана ӨКМ жетекчиси Кубатбек Боронов учуп кеткен. Алар эл менен жолугуп, кырсыктын кесепеттерин жоюу боюнча иштерге көзөмөл кылып жүрүшөт.