БИШКЕК, 22-май — Sputnik. Президент Алмазбек Атамбаев Кыргызстанга расмий сапар менен келген Кытайдын тышкы иштер министри Ван Ини "Данакер" ордени менен сыйлады. Бул тууралуу Тышкы иштер министрлиги билдирди.
Эскерте кетсек, Ван И Кыргызстанга 21-майда эки күндүк расмий сапар менен келген. Президентке чейин ал кыргызстандык кесиптеши Эрлан Абдылдаев менен жолугуп, эки тараптуу мамилелер талкууланган.
"Сыйлык Ван И мырзанын Кыргызстан менен Кытайдын ортосундагы тынчтыкты, достукту жана кызматташууну бекемдөөгө кошкон салымы үчүн ыйгарылды", — деп айтылат билдирүүдө.
Орден ыйгарылгандан кийин Атамбаев Ван И менен эл аралык маселелер, аймактык коопсуздук жаатындагы кызматташуу боюнча баарлашты. Тараптар эки мамлекеттин ортосундагы жогорку деңгээлдеги мамилелерге баа берип, саясий, соода-экономикалык жана коопсуздук боюнча эки тараптуу кызматташуу маселесинде жетишилген ийгиликтерге басым жасалды.
