БИШКЕК, 19-май — Sputnik. Тарых жана маданият жылына карата өлкө аймагы боюнча төкмө акындардын турнеси башталат. Бул тууралуу "Ыйман" диний маданиятты өнүктүрүү фондунан билдиришти.
Фонд тарабынан уюштурулуп жаткан турне "Улуттук маданият, билим берүү жана руханият" долбоорунун алкагында өткөрүлүп, 23-май күнү борбор калаада башталат.
Иш-чара улуттук маданиятты сактоо, руханий байлыкты жогорулатуу, ата-бабадан калган асыл мурастарды жана руханий баалуулуктарды жандантуу максатында уюштурулуп жатканы маалыматта белгиленген.
Турне алгач Бишкекте 23-май күнү Токтогул Сатылганов атындагы улуттук филармонияда башталып, 25-май күнү Нарында өтсө, 26-28-май аралыгында Жалал-Абадда уланат.
