БИШКЕК, 15-май — Sputnik. Кыргызстандын аймагында музейлер жумалыгы башталды. Бул тууралуу Тарых жана маданият жылын өткөрүү боюнча мамлекеттик дирекциядан билдиришти.
Маалыматка ылайык, 11-29-май аралыгында Гапар Айтиев атындагы көркөм сүрөт музейинде 1916-жылдагы кайгылуу окуяларга арналган республикалык көргөзмө жана Кыргыз Эл сүрөтчүсү Юристанбек Шыгаевдин "Үркүн-1916" аттуу жеке көргөзмөсү уланууда.
Ал эми Михаил Фрунзе атындагы мамлекеттик мемориалдык үй-музейинде "Музей жана балдар" сынагы менен "Биз музейге барабыз" темасында викториналар менен мастер-класстарды уюштуруу пландалууда.
Маалыматта музейлер жумалыгы өлкөнүн башка аймактарында дагы өткөрүлүп, көргөзмөлөр уюштурулары белгиленген.
