БИШКЕК, 12-май — Sputnik. Грек-рим күрөшү боюнча балбан Жанарбек Кенжеев Олимпиадалык лицензиядан мельдоний каражатын пайдаланганы үчүн ажыратылганын өкмөттүн маалымат кызматы билдирди.
Улуттук олимпиада комитети грек-рим күрөшү боюнча балбан Жанарбек Кенжеевдин жолдомосунун алынышы боюнча абалга түшүндүрмө берип, спортчу мельдоний каражатын колдонгону үчүн ушундай чара көрүлгөнүн маалымдады. Бул допинг каражаты 2016-жылдын 1-январынын тарта тыюу салынган.
Эскерте кетсек, кыргызстандык балбан жолдомого Казакстандын Астана шаарында өткөн лицензиялык турнирде ээ болгон.
Аталган допинг үстүбүздөгү жылдын март айында Австралиянын ачык чемпионатына катышкан россиялык спортчу Мария Шараповадан да табылган. Анын кесепетинен теннисчи 12-марттан тарта мелдештерге катышуудан четтетилген болчу.
