БИШКЕК, 9-май — Sputnik. Жалал-Абаддагы Чаткал районуна караштуу Шекафтар айылында "Өлбөс полк" жүрүшү болду. Бул тууралуу айыл тургуну Рашит Гизатулин билдирди.
"Жөө жүрүшкө 200гө чукул адам катышты. Алардын 50гө жакыны согуш ардагерлеринин туугандары. Тилекке каршы жүрүшкө ардагерлер катыша алган жок. Анткени айылда согуш ардагерлери калган эмес", — дейт Гизатулин.
Анын айтымында жөө жүрүшкө чыккандар эки чакырымдай жерди басып өтүшкөн. Иш-чарадан кийин жүрүштүн катышуучуларына сый тамак берилди.
Гизатулин былтыркы жылы айылдагы согуш баатырларына арналган эстеликти реставрация кылуу үчүн 95 миң сом насыя алган.
"Мен насыяны эстеликти оңдоо үчүн алып жатам десем банк кызматкерлери мага бермек эмес. Андыктар айыл-чарбага колдоном деп, 1,5 жыл убакытка алгам", — дейт айыл тургуну.
Ал насыяны төлөө мөөнөтү 2016-жылдын сентябрь айында бүтөөрүн кошумчалады.
