БИШКЕК, 6-май — Sputnik. 9-май күнү Бишкектеги Жеңиш аянты кайтарууга алына турганын шаардык ИИББ билдирди.
Майрамдык иш-чаралардын маалында шаар тургундары менен меймандардын коопсуздугун сактоого эки миң милиция кызматкери жана ИИМ академиясынын 200 курсанты тартылат.
Укук коргоо органдарына коомдук уюмдар жардам берет. Аянтка кире бериш жерлердин баарына өткөрүү пункттары уюштурулат. Ал эми шаардын "Ала-Тоо" аянтында кинологдор иштейт. Аталган жерге жакын көчөлөрдүн айрым бөлүгү жабылып, мындан тышкары, спирт ичимдиктерин сатууга тыюу салынат.
Салтанаттуу иш-чаралар аяктагандан кийин 80 милиционер ат оюндары өтө турган "Ак кула" ипподромунда тартипти көзөмөлдөйт.
