БИШКЕК, 3-май — Sputnik. Жалал-Абад облусунун Аксы районуна караштуу Кара-Суу айыл өкмөтүнүн Бечел-Аюу, Кезарт айылдарында сел жүрүп, бир нече үйдү жана короодогу 170 койду басып калган. Бул тууралуу Кара-Суу айыл өкмөтүнүн башчысы Талантбек Эмилбек уулу Sputnik Кыргызстан маалымат агенттигине билдирди.
Өзгөчө кырдаалдар министрлигинин маалыматына ылайык, 3-майда таңкы саат 05:00 чамасында Кезарт сайынан келген сел суулары сайдын жээгинде жайгашкан Кезарт жана Ак-Таш айылындагы 180 кожолукка барган. Төрт чакырым ички чарбалык унаа жолду шагыл таштар каптап, сел суулары темир бетондон курулган көпүрөнүн оң, сол жээгин жеп кеткен. Ошого байланыштуу жол каттамы убактылуу токтотулду.
"Кезарт айылында сел суулары эки турак жайга кирип, бир мал сарайды сел каптаган. Сарайдын ичиндеги 170 баш кой-эчки селдин алдында калды. Ал эми Бечел-Аюу колотунан келген сел суулары төрт турак жайдын, мал сарайлардын айланасын шагыл-таштарга толтурган", — деп ӨКМдин билдирүүсүндө айтылат.
Ал эми Кара-Суу айыл өкмөтүнүн башчысы Талантбек Эмилбек уулу учурда сарайдагы 170дей малдын 50гө жакын өлүгү чыгарылганын, калгандары табылбай жатканын кошумчалады.
