БИШКЕК, 3-май — Sputnik. Спорттун улуттук түрү боюнча дирекция Көчмөндөр оюнуна карата Кыргызстандын курама командасы жана калыстар тобу кие турган кийимдин жасалгасына сынак жарыялайт. Бул тууралуу аталган Дирекция билдирди.
Спортчулардын формасы баш кийим, көйнөк, шым, чапан, бут кийимден турушу шарт. Ал эми калыстар менен уюштуруу комитетинин мүчөлөрү баш кийим, көйнөк, чыптама, шым, бут кийим киет.
"Сынакка эмгегин сунуштаган автор өзү катышуусу шарт. Бардык эскиздер А2 форматында түстүү болуп, 10-майга чейин тапшырылышы зарыл. Мында катышуучу бир комплект кийимге кетчү каражатты кошо эсептеп чыгышы кажет", — деп айтылат билдирүүдө.
Сынактын жеңүүчүсү Дүйнөлүк көчмөндөр оюндарынын ардактуу коногу болуп, форма даярдоо менен байланышкан бардык иш-чараларга катышат.
Эскиздер Бишкек шаары, Тоголок Молдо көчөсү, 17 дареги боюнча кабыл алынат.
Эскерте кетсек, Көчмөндөр оюндары 3-8-сентябрь күндөрү Ысык-Көлдүн жээгинде өтөт.
