БИШКЕК, 3-май — Sputnik. Баткенде телефондон кишилерди алдап акча алган факты боюнча кылмыш иши козголгонун облустук ички иштер башкармалыгы билдирди.
Жабырлануучуга чалган шылуун алты жашар баланы тебелеп кеткенин айтып, акчаны Кызыл-Кыя шаарындагы Бам участкасынын талаасындагы зым карагайдын түбүнө калтыруусун талап кылган. Натыйжада аялдын 1500 доллары менен 21 миң сом акчасын алып кеткен.
"Учурда аталган факт боюнча 166-берененин (Алдамчылык) негизинде кылмыш иши козголду. Версиялар бар, бирок азырынча алар аталбайт", — деп айтылат билдирүүдө.
Баткен ОИИБи былтыр да ушундай шылуунчулук фактылары катталганын, анда чалган кишилер абакта жаза өтөп отургандар экенин аныкташкан.
Мындан улам укук коргоо органдары кимдир-бирөө жакын тааныштын атынан чалап акча берүүнү же которууну, же болбосо телефонго бирдик жүктөөнү суранса тез арада милицияга кабарлап коюуну өтүнөт.
